Фаромадагии узвҳои таносулӣ ва ё норасоии мушакҳои дохили кос ба маънои аз ҷои худ беҷо шудани узвҳои таносулӣ, монанди бачадон, масона ва рӯдаи рост мебошад, ки ба истилоҳи тиббӣ пролапси гениталӣ, систоселе ва ректоселе номида мешавад.

Ин беморӣ дар синну соли борварӣ (репродуктивӣ) шурӯъ мешавад ва авҷ гирифтани он ба вайрон шудани кори узвҳои коси хурд мерасонад ва на танҳо ба фаъолияти ҷисмонӣ, балки ба фаъолияти кории занон низ таъсироти манфӣ мерасонад.

Сабабҳои беморӣ:

- вайроншавии синтези ҳормонҳо;

- норасоии бофтаҳои пайвасткунананда;

- осеб дидани узвҳои коси хурд (ҳангоми таваллуд);

- бемории музмини шикам, ки ба афзоиши фишори дохили шикам меоварад;

   Яке аз инҳо боиси норасоии мушакҳо ва дар натиҷа пролапси андомҳои таносулӣ мешавад. Баланд шудани фишори дохили шикам беморро ба зӯр задан водор месозад ва дар натиҷа узвҳои таносулӣ аз ҷои худ беҷо мешаванд ё пойин мефароянд.

  Колбадшиносӣ (анатомия)-и андомҳои таносулӣ: Дар қисмати поёнии масона маҳбал ва дар пушти он рӯдаи рост аст, ки ҳангоми фаромадан ё беҷо шудани онҳо масона мисли халта мешавад.

Аломатҳои фаромадагии узвҳои таносулӣ:

- эҳсоси нороҳатӣ дар андомҳои таносулӣ;

- дарди поёни шикам ва миён;

- надоштании пешоб ё зуд-зуд пешобронӣ;

- қабзияти шикам ва рӯдаҳо;

-  дард ба ҳангоми робитаи ҷинсӣ;

Ташхис

Дар сурати вуҷуди яке аз ин аломатҳо, дармонҷӯ ба машварати пизишки занон (гинеколог), ташхиси соногрофӣ ва муоинаи раҳм ё бачадон ниёз дорад.

Табобат

Ислоҳ ё барқарорсозии пролапси узвҳои таносулӣ ба дараҷа ва мизони беҷо шудани онҳо аз ҷои худашон вобаста аст: дараҷаи аввал ва дувуми ин оризаро метавон бо машқҳои махсус барқарор кард; дараҷаи се ва чор танҳо бо роҳи анҷоми амалҳои ҷарроҳии плостикӣ ислоҳ мешавад: ислоҳи канали маҳбалӣ (колпоррафия), ислоҳи даридагиҳо дар маҳбал ва ё мушакҳои даҳонаи он (колпоперинеорафия), дӯхтан ё пайванд задани андоми фаромада ба девораи шикам (вентрофиксация) ба занҳои синну соли боло тавсия дода мешавад.