Томографии компютерӣ равиши ташхиси амиқи ҷисми инсон мебошад. Ин усул бар асоси нурафкании  рентгенӣ  сурат мегирад ва имкон медиҳад  аз ҳар узви лозим  дар муддати кӯтоҳ тасвири сифатан хубе ба даст оварда шавад.

Бемористони Ибни Сино бо дастгоҳи томогорафии компютерии пешрафта, ки  истеҳсоли ширкати "Siemens" мебошад, муҷаҳҳаз аст. Мутахассиси радиолоҷист Беҳрӯз Қаҳҳоров масъули  ин  дастгоҳ буда, давраи такмили ихтисосро  дар яке аз беҳтарин бемористонҳои Ҷумҳурии Исломии Эрон гузаронидааст. Мо барои шарҳи бештари мавзӯъ бо якчанд савол ба доктор Беҳрӯз Қаҳҳоров муроҷиат кардем.

 Доктор Қаҳҳоров,  лутфан дар мавриди ташхиси  томографии компютерӣ маълумот бидиҳед  ва бигўед, ки асосан барои ташхиси кадом бемориҳо   тавсия  дода мешавад?

Томографии компютерӣ яке аз усулҳои асосӣ ва пешрафтаи ташхис дар тиббӣ муосир  ба шумор меравад. Ба воситаи ин дастгоҳ бемориҳои зайлро хеле дақиқ ва зудтар метавон ташхис кард:

 -бемориҳои мағзи сар, осебҳои сар;                                                                             

- бемориҳои банду буғум ва  устухонҳо;                                                                                     

- бемориҳои сутунмӯҳра;                                                                                                          

- бемориҳои гурда, ҷигар, испурч, ғадуди зеъри меда ва ғ;                                              

- бемориҳои узвҳои роҳи нафас;                                               

- бемориҳои гулӯ, гӯш ва бинӣ (ЛОР) ва ғ.    

Бояд гуфт, бартарии тамографии компютерӣ дар он аст, ки ҳангоми гузаронидани ин навъи ташхис мизони нурафканӣ ё шуоъхӯрӣ нисбатан камтар аст.  Аммо гузаштан аз ин навъи ташхис танҳо бо тавсия ва роҳхати пизишк сурат мегирад. 

Доктор дар мавриди усулҳои ташхиси ТК каме маълумот медодед?

 Аз ТК метавон ҳам ба унвони  усули ташхиси ибтидоӣ (аввалия) ва ҳам ба унвони усули ташхиси таъйидкунанда  истифода намуд.                                 

 Усули ибтидоӣ  ё аввалия метавонад барои ташхиси бемориҳое, ки  зикр кардем,  мавриди истифода қарор гирад.                                                   

Усули таъйидкунанда  танҳо баъди гузаронидани ташхиси ибтидоӣ бо ёрии сонографӣ (УЗИ)  ва ё баъди тадқиқоти клиникӣ анҷом дода  мешавад.                                         

Инчунин барои ба даст овардани натиҷаи беҳтару дақиқтар ба бемор моеъи махсус, яъне контраст, тазриқ мешавад.  

Оё мавориди  манъи  истифода аз  ТК вуҷуд  дорад?

Мавориди хоссе дар истифода  аз ТК вуҷуд надорад. Ин усулро метавон ба мизоҷон дар ҳамаи ҳолатҳо (ҳатто дар ҳолати танаффуси сунъӣ) амалӣ намуд. Танҳо занони ҳомила ва кӯдакони хурдсол истисно мебошанд.   Онҳо пеш аз он ки  дар томография компютерӣ ташхис бишаванд,  бояд мавриди санҷиши  ҳамаҷониба  қарор гиранд. Инчунин тазриқи моъеҳои махсус ба баъзе беморон, ба хотири эҷоди ҳассосият  тавсия дода намешавад. Дар сурати зарурӣ қабл аз тазриқи  ин моъеҳо бояд  чораҳои  ҷилавгирӣ аз ҳассосият (аллергия)  пешбинӣ шавад.